بڑھتی عمر کے ساتھ صحت کے کن مسائل کا سامنا ہوسکتا ہے ؟

عمر کے بڑھنے کے ساتھ ساتھ انسان کی کمزوریاں بڑھتی جاتی ہیں اور وہ بیماریوں کا شکار ہوجاتا ہے۔ بچپن اور جوانی میں اگر وہ ہر طرح سے صحت مند رہا بھی ہو پھر بھی ایک وقت ایسا آتا ہے کہ اسے کوئی نہ کوئی بیماری گھیر ہی لیتی ہے ۔

بڑھتی عمر کہ ساتھ آپ کو اپنی صحت کے بارے میں زیادہ محتاط ہوجانا چاہئے۔ ایسی بہت سی باتیں ہیں جن کو اختیار کرکے بڑی عمر میں بھی آپ صحت مند زندگی گزار سکتے ہیں ۔

ہائی بلڈ پریشر:
عمر کے بڑھنے کے ساتھ خون کی نالیوں کی لچک کم ہوتی جاتی ہے جس کے نتیجے میں ان پر خون کا دبائو بڑھتا جاتا ہے۔یہی وجہ ہے کہ ساٹھ سال کی عمر کے بعد ۳ میں سے ۲ افراد ہائی بلڈ پریشر کا شکار ہوتے ہیں ۔اس کے علاوہ ہائی بلڈ پریشر کی اور بھی وجوہات ہو سکتی ہیں جن پر قابو پاکر آپ اپنا بلڈ پریشر نارمل رکھ سکتے ہیں ۔مثال کے طور پر اپنے وزن کا خیال رکھیں ،ورزش کریں ،سگریٹ نوشی ترک کردیں ،ذہنی دبائو پر قابو پانے کے طریقے اختیار کریں اور صحت بخش کھانا کھائیں۔

شوگر کا مرض:
یوں تو شوگر کا مرض بوڑھوں اور جوانوں دونوں میں ہی عام ہوتا جارہا ہے لیکن عام طور پر ۴۵ سال کی عمر کے بعد اس کے خطرات زیادہ بڑھ جاتے ہیں ۔یہ بیماری سنگین ہو سکتی ہے کیونکہ یہ دل کی بیماری،گردوں کی بیماری،نابینا پن اور صحت کے دوسرے مسائل کا باعث بن سکتی ہے ۔لہٰذا ۴۵ سال کی عمر کے بعد اپنا بلڈ شوگر لیول ضرور چیک کرائیں ۔

دل کی بیماری:
دل کی بیماری کی سب سے بڑی وجہ خون کی شریانوں میں پلاک کا جمع ہونا ہے ۔اس کی افزائش بچپن سے شروع ہوتی ہے اور بڑی عمر میں زیادہ تیزی سے ہوتی ہے یہی وجہ ہے کہ ۴۰ سے ۵۹ سال کے لوگوں میں جوانوں کے مقابلے میں دل کی بیماری کے امکانات ۵ گنا زیادہ بڑھ جاتے ہیں ۔

موٹاپا:
اگر آپ کا وزن آپ کے قد کے لحاظ سے زیادہ ہے تو آپ موٹے کہلائیں گے ۔موٹاپا ناصرف خود ایک بیماری ہے بلکہ یہ کئی خطرناک بیماریوں کی جڑ ہے۔ان میں دل کی بیماری،اسٹروک،شوگر،کینسر،ہائی بلڈ پریشر اور جوڑوں کی بیماری شامل ہے۔جو۴۰ سے ۴۹ سال کی عمر کے لوگوں میں سب سے زیادہ ہوتی ہیں اور ان میں سے ۴۱ فیصد لوگ موٹاپے کا شکارہوتے ہیں ۔

جوڑوں کا درد:
ایک وقت تھا جب ڈاکٹر اس کی وجہ بڑھتی ہوئی عمر بتاتے تھے کیونکہ ۴۵ سال سے زیادہ عمر کے۳۷ فیصد لوگوں میں یہ بیماری موجود ہے ۔لیکن بعض اوقات طرز زندگی اور موروثیت بھی اس کی وجہ بن جاتی ہے ۔جوڑ پر لگی پرانی چوٹ،جسمانی کام کی کمی ،شوگر اور موٹاپا بھی جوڑوں کے درد کی وجہ ہوسکتا ہے۔

ہڈیاں بھر بھری ہوجانا:
۵۰ سال سے زیادہ عمر کی ۵۰ فیصد عورتوں اور ۲۵ فیصد مردوں میں ہڈی ٹوٹنے کی زیادہ شکایت ہوتی ہے کیونکہ ان کی ہڈیاں بھربھری اورکمزور ہوجاتی ہیں ۔اپنی ہڈیوں کو مضبوط بنانے کے لئے کیلشیئم اور وٹامن ڈی سے بھرپور غذا کھائیں اس کے علاوہ روزانہ ورزش کریں جیسے واک،جوگنگ اور سیڑھیاں چڑھنا وغیرہ۔

from سچ ٹی وی اردو - تازہ ترین خبریں http://bit.ly/2Y54fww