معروف پاکستانی انگریزی اخبار کی رپورٹ کے مطابق وفاقی دارالحکومت کے نصف سے زائد علاقے کنٹینرز اور خار دار تاروں سے سیل کیے گیے ہیں جس کے باعث شہر کے رہائشی پریشانی کا شکار ہیں۔
آزادی مارچ آج (31 اکتوبر) شام شہر میں داخل ہونے کا امکان ہے لیکن انتظامیہ اور پولیس نے شرکا کی آمد سے ایک روز قبل ہی شہر کو سیل کرنا شروع کردیا۔
اس سلسلے میں ریڈزون، فیض آباد اور زیر پوائںٹ انٹرچینجز سمیت مختلف سڑکوں کو کنٹینر لگا کر بند کردیا گیا ہے۔
پولیس نے کہا کہ ' ریڈ زون جانے والے راستوں کو جمیعت علمائے اسلام (ف) کے آزادی مارچ کی جانب سے حساس مقامات پر جانے کی کسی کوشش روکنے کے لیے احتیاطاً بلاک کیا گیا ہے'۔
ابھی تک راستے جزوی طور پر بند کیے گئے ہیں اور ٹریفک کے لیے کم جگہ چھوڑی گئی ہے کہ ایک وقت میں صرف ایک ہی گاڑی گزر سکتی ہے جس سے ٹریفک کی روانی متاثر ہوسکتی ہے۔
اسلام آباد ٹریفک پولیس (آئی ٹی پی) نے گزشتہ روز آزادی مارچ کے شرکا کے لیے ٹریفک پلان اور شہریوں کے لیے متبادل راستے جاری کیا تھا۔
خیال رہے کہ آزادی مارچ کا مرکزی اجتماع ایچ- 9 میٹرو گراؤنڈ میں ہوگا اور مارچ کے شرکا کے لیے پارکنگ کی جگہ بھی مختص کی گئی ہے۔
اس دوران پشاور سے موٹر وے یا جی ٹی روڈ کے راستے سے آنے والے ریلیاں چونگی نمبر 26 کشمیر ہائی وے کے راستے شہر میں داخل ہوں گے، شرکا پشاور موڑ اور جی-9 ٹرن کی دونوں جانب اپنی گاڑیاں پارک کریں گے۔
جی ٹی روڈ کے راستے لاہور آنے والی ریلیاں اسلام آباد ایکسپریس وے جبکہ مری یا بھارہ کہو سے آنے والے ریلیاں ڈھوک کالا خان فلائے اوور سے فیض آباد پہنچیں گے اور نائنتھ ایونیو چوک آئیں گے جہاں سے وہ ایچ -9 گراؤنڈ جائیں گی،شرکا اپنی گاڑیاں نائنتھ ایونیو سروس روڈ (ویسٹ) پر پارک کریں گے۔
اسلام آباد ٹریفک پولیس کا کہنا ہے چونگی نمبر 26 سے اسلام آباد کی جانب ٹریفک موڑی جائے گی اور موٹروے سے اسلام آباد آنے والے لوگ چونگی نمبر 26 فلائی اوور کے ذریعے مہرآباد پیرودھائی، آئی جے پرنسپل روڈ، فیض آباد فلائی اوور، مری روڈ، ایکسپریس وے اور فیصل ایونیو جاسکیں گے۔
جی -11 میں کشمیر ہائی وے سے اسلام آباد کی جانب ٹریفک متبادل ہوگا جبکہ حاجی کیمپ چوک پر مہرآباد آئی جے پرنسپل روڈ کی جانب ٹریفک کا رخ موڑدیا جائے گا۔
علاوہ ازیں جی-9، جی -10 اور جی -11 سے پشاور موٹروے یا اسلام آباد انٹرنیشنل ایئرپورٹ جانے والے افراد اپنے سیکٹرز کے قریب سروس روڈ اور جی -11 ٹریفک سگنل کے ذریعے کشمیر ہائی وے استعمال کریں گے۔
ایکسپریس وے، بھارہ کہو، مری اور راولپنڈی جانے والے افراد مارگلہ روڈ، نائنتھ ایونیو، آئی جے پرنسپل روڈ یا فیصل ایونیو چوک، فیض آباد کا روٹ استعمال کرسکیں گے۔
مری یا بھارہ کہو سے موٹروے، پشاور یا ایئرپورٹ جانے والے افراد مری روڈ، راول ڈیم چوک اور آئی جے پرنسپل روڈ استعمال کرسکیں گے۔
علاوہ ازیں گولڑہ شریف سے اسلام آباد چوک تک ٹریفک کا متبادل روٹ ترتیب دیا گیا ہے جبکہ جی-11 یا گولڑہ سے آنے والی ٹریفک جی -11 سروس اور مارگلہ روڈز استعمال کرسکے گی۔
ساتھ ہی زیرو پوائنٹ سے کشمیر ہائی وے پر جی-11 ٹریفک سگنل تک بھی ایک اور متبادل روٹ دیا گیا ہے جبکہ جی-5، جی-6، جی-7، جی-8، ایف-6، ایف-7 اور ایف-8 سے راولپنڈی جانے والے افراد فیصل ایونیو، فیض آباد، مری روڈ اور آئی جے پرنسپل روڈ استعمال کرسکیں گے۔
ٹریفک پلان کے مطابق جی-9، جی-10، جی-11، ایف -8، ایف -10 اور ای-9 سے راولپنڈی جانے والے افراد مارگلہ روڈ اور نائنتھ ایونیو استعمال کرسکیں گے۔
سیکٹر آئی -10 میں نیسکام چوک سے فقیر ایپی روڈ آنے والے افراد کے لیے پولیس لائنز چوک کا متبادل روٹ دیا گیا ہے اور وہ نائنتھ ایونیو یا آئی جے پرنسپل روڈ جانے کے لیے آئی-10 (بیرونی روڈ) بھی استعمال کرسکیں گے۔
علاوہ ازیں سیون اپ چوک سے بازار سروس روڈ پر ایجوکیشن چوک کی جانب ایک متبادل روٹ قائم کیا جائے گا جبکہ سیکٹر ایچ -3/8، ایچ -4/8 اور آئی -9 کے رہائشی سیون اپ چوک سے نائنتھ ایونیو یا آئی جے پرنسپل روڈ جاسکیں گے۔
ساتھ ہی اسلام آباد ٹریفک پولیس کا ایف ایم ریڈیو 92.4 شہریوں کو ٹریفک کی صورتحال سے باخبر رکھنے کے لیے خصوصی ٹرانسمیشن نشر کرے گا۔
پولیس نے کسی ناخوشگوار واقعے سے نمٹنے کے لیے بھی پلان مرتب کیا ہے اور اس حوالے سے پولیس کے تمام سپرنٹنڈنٹس، سب ڈویژنل پولیس افسران اور اسٹیشن ہاؤس افسران کو ہدایات جاری کیں ہیں۔
ساتھ ہی ایسے واقعات سے نمٹنے کے لیے انسداد دہشت گردی فورس کو بھی ہدایات جاری کی گئی ہیں۔
سینئر سپرنٹنڈنٹ پولیس (ایس ایس پی) کے دفتر میں کنٹرول روم قائم کرنے اور سیف سٹی ڈائریکٹر کو سی سی ٹی وی کے ذریعے صورتحال کی نگرانی کی ہدایات جاری کی گئی ہیں۔
from سچ ٹی وی اردو - تازہ ترین خبریں https://ift.tt/2PIUCTF
0 comments: