فہد مصطفیٰ اور مہوش حیات کی جانب سے کسی کا نام لیے بغیر سوشل میڈیا پر تنقید

شوبز انڈسٹری میں کسی سے اختلاف یا پھر کسی سے تعلق استوار کرنے کا بظاہر کوئی اصول نہیں ہوتا یا یوں کہیے کہ اختلافات اور تعلقات اس انڈسٹری کا حصہ ہیں۔

پاکستانی شوبز انڈسٹری میں بھی اداکار ایک دوسرے اختلافات اور تعلقات استوار کرتے نظرآتے ہیں۔

اب اداکار فہد مصطفیٰ اور مہوش حیات کی جانب سے کسی کا نام لیے بغیر سوشل میڈیا پر تنقید کیے جانے سے ایسا محسوس ہو رہا ہے کہ دونوں میں سرد جنگ شروع ہوچکی ہے۔

اس سرد جنگ کی شروعات کچھ دن قبل فہد مصطفیٰ نے کسی کا نام لیے بغیر ایک ٹوئیٹ کے ذریعے کی۔

فہد مصطفیٰ نے اپنی ایک ٹوئیٹ میں کسی شخصیت یا ویب سیریز کا نام لیے بغیر ویب سیریز کے مواد کو تنقید کا نشانہ بنایا تھا اور کہا تھا کہ عریانیت پر مبنی سیریز کو اظہار رائے کی آزادی کا نام نہیں دیا جاسکتا۔

اداکار نے کسی بھی ویب سیریز، اداکار اور ہدایت کار کا نام لیے بغیر لکھا تھا کہ ’ویب سیریز میں سیکس اور عریانیت کی بات کرنا اظہار رائے کی آزادی نہیں‘۔

اداکار نے اپنی ٹوئیٹ میں لکھا تھا کہ عریانیت کی تشہیر، نامناسب زبان کا استعمال اور صرف سیکس پر بات کرنے کو مواد نہیں کہتے اور اسے اظہار رائے کی آزادی قرار دینا یا کہنا بند کریں۔

ساتھ ہی فہد مصطفیٰ نے لکھا تھا کہ ویب سیریز میں اس طرح کام کرنے والے اداکار کوئی اچھا کام نہیں کر رہے۔

اگرچہ انہوں نے کسی کا نام نہیں لکھا تھا تاہم ہدایت کار وجاہت رؤف نے اداکار کو مخاطب کرتے ہوئے ٹوئیٹ کی تھی کہ ’وہ جانتے ہیں اور ساتھ ہی انہیں اس بات میں بھی کوئی شک نہیں کہ فہد مصطفیٰ کسی کی محنت کو تسلیم کرنے سے انکار نہیں کریں گے اور خصوصی طور پر اگر محنت اور کام کرنے والا شخص خود ان کی اپنی فیلڈ سے ہو۔

ساتھ ہی وجاہت رؤف نے فہد مصطفیٰ کے لیے نیک خواہشات کا اظہار کرتے ہوئے انہیں جینے کی دعا بھی دی تھی۔

فہد مصطفیٰ نے بھی وجاہت رؤف کی ٹوئیٹ کا جواب دیا تھا اور انہوں نے دوسری ٹوئیٹ میں وضاحت کی تھی کہ ان کی تنقید کا مطلب کیا تھا اور وہ کس پر تنقید کر رہے تھے۔

فہد مصطفیٰ نے دوسری ٹوئیٹ میں وجاہت رؤف کو مخاطب کرتے ہوئے لکھا تھا کہ وہ ان کی نہیں بلکہ غیر ملکی ویب سیریز کی بات کر رہے تھے۔

تاہم اب وجاہت رؤف کی ویب سیریز ’عنایہ‘ میں کام کرنے والی اداکارہ مہوش حیات نے بھی کسی کا نام لیے بغیر اپنی انسٹاگرام پوسٹ پر کئی باتیں اشارتاََلکھی ہیں۔

مہوش حیات نے فہد مصطفیٰ کا نام لیے بغیر افسوس کا اظہار کرتے ہوئے لکھا کہ ان کی ویب سیریز ’عنایہ‘ میں ٹریلر میں دکھائے جانے والے 2 جملوں کے علاوہ بھی بہت ساری باتیں ہیں۔

اداکارہ نے مزید لکھا کہ کچھ لوگوں نے عنایہ کو مکمل دیکھے بغیر تنقید شروع کردی۔

مہوش حیات نے لکھا کہ ان کی ویب سیریز میں جہاں نوجوان نسل کے مسائل کی عکاسی کی گئی ہے، وہیں عنایہ کا مواد اور مناظر بھی ٹھیک ہیں۔

ساتھ ہی انہوں نے تنقید کرنے والوں کو مشورہ دیا کہ انہیں عقل مندی اور بڑے دل کا مظاہرہ کرنا چاہیے، کیوں کہ کچھ الفاظ سے پوری قوم غلط نہیں ہوسکتی۔

from سچ ٹی وی اردو - تازہ ترین خبریں http://bit.ly/2MY8WUL

• Tweet
• Share
• Share
• Share
• Share