پی ایس او 200 ارب روپے کے بانڈ میں تاخیر سے مشکلات کا شکار

پاکستان اسٹیٹ آئل 200 ارب روپے کے اسلامک بانڈ کے اجراء میں تاخیر سے شدید مشکلات کا شکار ہوگیا جہاں اس کے واجب الوصول رقم 364 ارب روپے سے زائد ہوگئی۔

وزارت پیٹرولیم کے سینیئر حکام کا کہنا تھا کہ جنوری 2018 تک صرف توانائی کے شعبوں سے واجب الوصول رقم 265 ارب روپے ہے جبکہ سوئی نادرن گیس پائپ لائنز لمیٹڈ (ایس این جی پی ایل) ایل این جی سپلائی کی جانب پی ایس او کے 51 ارب روپے واجب الوصول ہیں جس سے گیس کا شعبہ بھی متاثر ہورہا ہے۔

اس کے علاوہ پی ایس او کو پاکستان انٹرنیشنل ایئرلائنز کی جانب سے بھی 48 ارب روپے واجب الوصول ہیں۔

ملک کے سب سے بڑے تیل فراہم کرنے والے ادارے نے وزارت پیٹرولیم اور فائنانس ڈویژن پر 100 ارب روپے جاری کرنے کے لیے دباؤ ڈالنا شروع کردیا ہے تاکہ ایل این جی سمیت دیگر پیٹرولیم مصنوعات کی سپلائی برقرار رہ سکے۔

پی ایس او کی 43 ارب روپے کی رقم غیر ملکی سپلائرز کی جانب سے بھی واجب الوصول ہے جبکہ 15 ارب روپے مقامی ریفائنریز نے دینے ہیں۔

حکام کا کہنا تھا کہ فنڈز کو جاری کرنے کے بجائے ایل این جی کارگوز منگوانے پر حکومت پی ایس او پر برہمی کا اظہار کر رہی ہے۔

ان کا کہنا تھا کہ اسد عمر نے 2 ہفتے قبل وعدہ کیا تھا کہ پی ایس او کو فنڈز ایک ہفتے میں موصول ہوجائیں گے جو 2 ہفتے گزر جانے کے باوجود ایک خواب لگ رہے ہیں۔

ذرائع کا کہنا تھا کہ فنڈ کے اجراء  میں تاخیر کی 2 وجوہات ہیں، پہلی گزشتہ ماہ اقتصادی رابطہ کمیٹی کی جانب سے کیے گئے فیصلے کے مطابق وزارت خزانہ کو 10 سے 15 جنوری کے درمیان اسلامک سکوک بانڈز جاری ہونے کی امید تھی جو جاری نہیں ہوسکا۔

دوسری وجہ، ایس این جی پی ایل کے سابق مینیجنگ ڈائریکٹر امجد لطیف نے اپنے بورڈ آف ڈائریکٹرز کی منظوری سے پی ایس او واجب الادا رقم کم کرنے کے لیے 25 ارب روپے کا انتظام کرنے کا وعدہ تھا تاہم امجد لطیف وزیر اعظم کے احکامات پر اپنی نوکری سے برطرف ہوگئے۔

from سچ ٹی وی اردو - تازہ ترین خبریں http://bit.ly/2T0JlMV

• Tweet
• Share
• Share
• Share
• Share