شاہد آفریدی نے تاریخ پیدائش کے حوالے سے ایک اور بڑا انکشاف کر دیا

قومی کرکٹ ٹیم کے سابق کپتان اور مایہ ناز آل راؤنڈر شاہد خان آفریدی نے اپنی کتاب میں ان کی تاریخ پیدائش کی غلطی کی نشان دہی کردی جبکہ ان کا کہنا ہے کہ وہ پہلے ہی سیاست میں ہیں۔

کراچی کے نجی مال میں شاہد آفریدی کی کتاب ‘گیم چینجر’ کی تقریب رونمائی ہوئی جہاں ان کا کہنا تھا کہ 'میری تاریخ پیدائش کتاب میں غلط لکھی گئی ہے، لیکن ہم کتاب میں جلد تاریخ پیدائش ٹھیک کرلیں گے۔'

ان کا کہنا تھا کہ 'میڈیا رپورٹس نے تو مجھے 45 سال کا بنا دیا ہے حالانکہ میں‌ اب اتنا بھی بوڑھا نہیں ہو‌ں، میری پیدائش 1975 نہیں بلکہ 1977 ہے۔'

کتاب کے حوالے سے شائع رپورٹس پر بات کرتے ہوئے ان کا کہنا تھا کہ 'میڈیا نے میری کتاب کا صرف منفی پہلو دکھایا، کوئی فرشتہ نہیں ہے اور میں نے کتاب میں کسی کی صرف برائی نہیں کی بلکہ اچھائی بھی کی ہے۔'

شاہد آفریدی نے کہا کہ بھارتی پبلشرز سے کتاب شائع کروانے کا فیصلہ میرا نہیں تھا۔

وزیر اعظم عمران خان کے حوالے سے اپنے تاثرات کا اظہار کرتے ہوئے انہوں نے کہا کہ 'عمران خان ہم سب کی امید ہیں، عمران خان کو تھوڑا وقت دینا چاہیے اور عمران خان کے گرد جو لوگ ہیں وہ بھی اچھے ہونے چاہیئیں۔'

سابق کپتان نے سیاست میں آنے کے حوالے سے کہا کہ 'میں تو پہلے سے ہی سیاست کر رہا ہوں، عوام مجھے پیسے دیتے ہیں اور میں فاؤنڈیشن چلاتا ہوں، یہ بھی سیاست ہے۔'

خیال رہے کہ میڈیا رپورٹس میں شاہد آفریدی کی کتاب کا حوالہ دیتے ہوئے کہا گیا تھا کہ انہوں نے اپنی پیدائش 1975 تحریر کی ہے تاہم مہینہ اور دن نہیں بتایا جس کے بعد ان کی صحیح عمر برسوں بعد سامنے آئی ہے۔

شاہد آفریدی کی عمر کرکٹ کے ریکارڈ میں یکم مارچ 1980 درج ہے جبکہ انہوں نے کتاب میں 1975 شائع کی اور اب انہوں نے وضاحت کرتے ہوئے کہا ہے کہ ان کی پیدائش 1977 میں ہوئی۔

شاہد آفریدی نے 1996 میں کینیا کے شہر نیروبی میں ہونے والے تین ملکی ٹورنامنٹ میں شرکت کی تھی اور 37 گیندوں پر تیز ترین سنچری کا ریکارڈ بنایا جو کہ 17 سال تک ان کے پاس ہی رہا۔

اس ریکارڈ کی خاص بات یہ تھی کہ مانا جاتا تھا کہ شاہد آفریدی نے 16 سال کی عمر میں اسے بنایا تھا۔

رپورٹس میں اس ریکارڈ کے حوالے سے کہا گیا تھا کہ شاہد آفریدی نے کتاب میں کہا ہے کہ 'ریکارڈ کے لیے جان لیں کہ میں اس وقت 19 سال کا تھا، 16 سال کا نہیں، جیسا وہ دعویٰ کرتے ہیں، میری پیدائش 1975 میں ہوئی، تو ہاں انتظامیہ نے میری عمر غلط درج کی'۔،

from سچ ٹی وی اردو - تازہ ترین خبریں http://bit.ly/2PLHo6k