پاکستان اور آسٹریلیا کے مابین 5 میچز پر مشتمل ون ڈے سیریز 22 مارچ سے متحدہ عرب امارات میں شروع ہوگی۔ پاکستان کرکٹ بورڈ نے آسٹریلیا کے خلاف ہوم سیریز کے لیے قومی کرکٹ ٹیم کے 16 رکنی اسکواڈ کا اعلان کردیا ہے۔
قومی کپتان سرفراز احمد کو آرام دیا گیا ہے، جن کی جگہ سینئر کھلاڑی شعیب ملک کپتانی کے فرائض انجام دیں گے۔ واضح رہے کہ جنوبی افریقہ کے خلاف ایک روزہ میچ کے دوران نسل پرستانہ جملے کہنے پر سرفراز احمد پر 4 میچز کی پابندی لگ گئی تھی۔
پابندی کے فوری بعد ہی سرفراز احمد کو جنوبی افریقہ سے واپس بلالیا گیا تھا، اس معاملے پر میڈیا میں کافی بحث و مباحثے بھی ہوئے تھے اور بعض سینئر کرکٹرز اور تجزیہ کاروں نے خدشات کا اظہار کیا تھا کہ سرفراز احمد کی کپتانی خطرے میں پڑگئی ہے۔
اسکواڈ میں کپتان شعیب ملک، فہیم اشرف، حارث سہیل، محمد رضوان، شان مسعود، عمراکمل، جنید خان عثمان شنواری اور یاسر شاہ شامل ہیں۔
قومی ٹیم کے 16 رکنی اسکواڈ میں عماد وسیم، امام الحق، عابد علی اور محمدعامر کو بھی شامل کیا گیا ہے جبکہ 3 نوجوان کھلاڑی محمد حسنین، سعد علی اور محمد عباس پہلی بار قومی ٹیم کا حصہ ہوں گے۔
کپتان سرفراز احمد کی جگہ محمد رضوان وکٹ کیپنگ کریں گے۔ قومی کرکٹ ٹیم کے چیف سلیکٹر انضمام الحق نے سرفراز کی عدم شمولیت سے متعلق بتایا کہ سرفراز احمد ہمارا کپتان ہے، گھبرانے والی بات نہیں۔
انہوں نے کہا کہ ایسی خبریں چل رہی ہیں کہ سرفراز آرام نہیں کرنا چاہتے تاہم ایسی خبروں میں کوئی صداقت نہیں ہے۔
انضمام الحق نے بتایا کہ کوچ اور کپتان سے مشاورت کے بعد ٹیم فائنل کی ہے۔ انہوں نے کہا کہ عمر اکمل سےکوئی ذاتی اختلاف نہیں، مکی آرتھر نے خود کہا کہ عمر اکمل کو لاؤ۔
چیف سلیکٹر نے بتایا کہ سرفراز احمد، بابر اعظم، فخر زمان، شاہین آفریدی، شاداب خان اور حسن علی کو آرام دیا گیا ہے جب کہ حسین طلعت کو ڈراپ کیا گیا ہے۔
یاد رہے کہ سرفراز احمد نے جنوبی افریقہ کے خلاف ایک روزہ سیریز کے دوسرے میچ میں متوقع شکست کو دیکھتے ہوئے غصے کے عالم میں جنوبی افریقہ کے آل راؤنڈر فلکوایو پر 'نسل پرستانہ' جملے کہے تھے جس کو براہ راست سنا گیا تھا۔
قومی ٹیم کے کپتان کی یہ ویڈیو میچ کے فوراً بعد سوشل میڈیا پر وائرل ہو گئی تھی اور انہیں پاکستانی شائقین کے ساتھ ساتھ سابق کرکٹرز نے بھی تنقید کا نشانہ بناتے ہوئے ان سے معافی مانگنے کا مطالبہ کیا تھا۔
جس کے بعد سرفراز احمد نے اپنے الفاظ پر معذرت کرتے ہوئے کہا تھا کہ ان کا مقصد کسی کو نشانہ بنانا نہیں تھا جبکہ پی سی بی نے بھی ٹیم کے کپتان کی جانب سے نسل پرستانہ جملے کسنے پر افسوس کا اظہار کیا تھا۔
بعد ازاں انٹرنیشنل کرکٹ کونسل نے نسلی تعصب پر مبنی جملے کسنے پر سرفراز احمد پر 4 میچز پر پابندی عائد کردی تھی جس پر پاکستان کرکٹ بورڈ نے افسوس کا اظہار کیا تھا۔
from سچ ٹی وی اردو - تازہ ترین خبریں https://ift.tt/2EHkcBa
0 comments: