ایس ایس پی سٹی مقدس حیدر کے مطابق گھاس منڈی میں واقع پرانا حاجی کیمپ ٹمبر مارکیٹ کے قریب جھگڑے کے دوران فائرنگ سے پی ٹی آئی کے رکن سندھ اسمبلی رمضان گھانچی ٹانگ میں گولی لگنے سے زخمی ہوگئے جنہیں فوری طور پر سول اسپتال منتقل کردیا گیا، ڈاکٹروں کے مطابق ان کی حالت خطرے سے باہر ہے۔
انہوں نے مزید بتایا کہ فائرنگ کا واقعہ پانی کی لائن کے تنازع پر پیش آیا۔
دوسری جانب نیپیئر تھانے میں واقعے کا مقدمہ درج کرکے فائرنگ کے الزام میں ٹمبر مارکیٹ کے عہدیدار سلیمان سومرو اور ان کے بیٹے کو حراست میں لے لیا گیا۔
نیپیئر تھانے کے باہر میڈیا سے گفتگو کرتے ہوئے پی ٹی آئی کراچی چیپٹر کے صدر خرم شیر زمان نے بتایا کہ 'انہیں رمضان گھانچی کا فون آیا تھا، جنہوں نے بتایا کہ انہیں سلیمان سومرو اور اس کے بیٹے نے گولیاں ماریں'۔
ان کا کہنا تھا کہ 'جب ایک ایم پی اے محفوظ نہیں تو عام آدمی کا کیا ہوگا'۔
ساتھ ہی خرم شیر زمان نے وزیر اعلیٰ سندھ مراد علی شاہ سے مطالبہ کیا کہ حملہ آورں کے خلاف سخت کارروائی کی جائے۔
ان کا مزید کہنا تھا کہ 'ریاست کی ذمےداری ہے کہ واقعے میں ملوث ملزمان کو قرار واقعی سزا دی جائے'۔
خرم شیر زمان کے مطابق واقعہ 'شہر کے امن کو تباہ کرنے کی کوشش ہے، جس پر آج ہونے والے سندھ اسمبلی کے اجلاس میں بھی احتجاج کیا جائے گا'۔
پی ٹی آئی رہنماؤں کی مذمت
رکن صوبائی اسمبلی رمضان گھانچی پر فائرنگ کے واقعے کی مذمت کرتے ہوئے پی ٹی آئی رہنما علی حیدر زیدی نے کہا کہ 'یہ اوچھے ہتھکنڈے ہمیں اپنے ہمارے اہداف کے حصول سے نہیں روک سکتے'۔
ان کا مزید کہنا تھا کہ 'ہم ملک کو لوٹنے والوں کا احتساب جاری رکھیں گے اور پاکستان کو معاشی بحالی کی راہ پر گامزن کریں گے'۔
دوسری جانب تحریک انصاف کے رکن قومی اسمبلی آفتاب صدیقی نے بھی رمضان گھانچی پر فائرنگ کی مذمت کرتے ہوئے کہا کہ 'انصاف ہوگا اور اس واقعے میں ملوث ملزمان کو سخت ترین سزا کا سامنا کرنا پڑے گا'۔
آفتاب صدیقی نے زخمی ایم پی اے کی جلد از جلد صحت یابی کے لیے بھی دعا کی۔
from سچ ٹی وی اردو - تازہ ترین خبریں http://bit.ly/2Tecnc2
0 comments: