وزیرخارجہ شاہ محمود قریشی دو روزہ سرکاری دورے پر سری لنکا پہنچ گئے، کہتے ہیں موجودہ وزیراعظم سری لنکا گذشتہ دو ادوار میں سری لنکا کے صدر رہ چکے ہیں ان کے ادوار میں پاکستان اور سری لنکا کے مابین دو طرفہ تعلقات بہت مستحکم ہوئے۔
وزیرخارجہ کی بندرانائیکے انٹرنیشنل ائیر پورٹ کولمبو پہنچنے پر وزارت خارجہ سری لنکا کے ایڈیشنل سیکرٹری ایمبیسڈر پی سلوراج اور پاکستانی ہائی کمیشن کے اعلیٰ حکام نے وزیر خارجہ کا پرتپاک خیرمقدم کیا۔ وزیرخارجہ اپنے دورے کے دوران سری لنکا کے نومنتخب صدر وزیر اعظم اور وزیر خارجہ سے الگ الگ ملاقاتیں کریں گے اور منصب سنبھالنے پر مبارکباد دیں گے۔
کولمبو ائرپورٹ پر میڈیا سے گفتگو میں وزیرخارجہ کا کہنا تھا کہ پاکستان اور سری لنکا کے مابین دیرینہ مضبوط مراسم ہیں۔ دونوں ممالک کے پاس ایک دوسرے سے مستفید ہونے کے بہترین مواقع موجود ہیں۔ پاکستان اور سری لنکا نے باہمی طور پر ایک دوسرے کی ہمیشہ معاونت کی ہے اور بین الاقوامی سطح پر بھی ایک دوسرے کو سپورٹ کیا ہے۔
وزیرخارجہ کا کہنا تھا کہ دورے کے دوران سری لنکا کے صدر، وزیر اعظم اور ہم منصب سے ملاقات شیڈول ہیں۔
from سچ ٹی وی اردو - تازہ ترین خبریں https://ift.tt/33Hy3lo
0 comments: