شیخ رشید احمد نے طالبات کو موبائل فون کم استعمال کرنے اور رات کو جلدی سونے کا مشورہ دیتے ہوئے کہا ہے کہ اگر ان کا بس چلے تو اسمارٹ فون ہی بند کروادیں۔
انہوں نے بتایا کہ مجھے سیاسی زندگی میں جتنے پلاٹ ملے سب پر درس گاہیں بنائی ہیں، میری اس کالج سے بھی بہت سی یادیں وابستہ ہیں۔
وزیر ریلوے کا کہنا تھا کہ سرسید روڈ پر خواتین کالج کا ٹھیکا دے دیا ہے، پولیس لائن کو منتقل کرکے اس کی جگہ یونیورسٹی بنانا چاہتا ہوں، اس کالج میں تب ہی واپس آؤں گا جب کالج یونیورسٹی میں تبدیل کرلوں گا۔
شیخ رشید نے کہا کہ شہر میں نرسنگ کالج اور اسپتال بنوا رہا ہوں، ساتھ ہی انہوں نے کالج انتظامیہ کو پیشکش کی اگر یہ کالج یونیورسٹی بن گیا تو لال حویلی کو بھی اس کا کیمپس بنا لیں۔
وزیر ریلوے نے کہا کہ لڑکے کم پڑھتے ہیں، یہی وجہ ہے کہ لڑکے کو 450 اور لڑکی کو 700 نمبر پر داخلہ ملتا ہے۔
شیخ رشید نے طالبات کو تعلیم پر مکمل توجہ دینے کی ہدایت دیتے ہوئے موبائل فون کا استعمال بھی کم کرنے اور رات جلدی سونے کا مشورہ دیا۔
وزیر ریلوے نے کہا کہ رات کو سب جلدی سویا کریں، موبائل فون استعمال نا کیا کریں، میرا بس چلے تو میں اسمارٹ فون ہی بند کروادوں۔
وزیر ریلوے نے اپنے سوشل میڈیا کے استعمال سے بھی طالبات کو آگاہ کیا اور بتایا کہ وزیراعظم عمران خان مجھے کہتے ہیں کہ میرے 5 لاکھ فالوورز ہیں لیکن وزیراعظم کو بتایا کہ میں نے تو آج تک ٹوئٹ ہی نہیں کی۔
شیخ رشید نے اپنی ڈگری اصل ہونے کا بھی دعویٰ کرتے ہوئے کہا کہ کئی سیاستدانوں کی جعلی ڈگری سامنے آئی لیکن مجھ پر آج تک کسی نے جعلی ڈگری ہونے کا الزام نہیں لگایا کیونکہ میری ڈگری بی اے میں کمپارٹ تھی اور جس کے نتیجے میں کمپارٹ ہوتی ہے اس کی ڈگری پر شک نہیں ہوتا۔
from سچ ٹی وی اردو - تازہ ترین خبریں https://ift.tt/2WqnCzr
0 comments: